في منطقة عين بوعلي ، بمولاي يعقوب ، قرر فلاح مشهور متزوج، وأب لأطفال، يعيش حياة عادية بين الزرع والجلبانة، أنه يبدّل الروتين ويولي شاعر العصر الرقمي، ويتحول إلى “قيس الواتساب” !
الفلاح بدا يقصف جارته المتزوجة، وأم لثلاثة أطفال، برسائل فيها من العشق ما يكفي لإنتاج مسلسل تركي من 120 حلقة:
“راه كنبغيك أكثر من راسي فهميني عفاك”،
“منين كتكوني غادة قدامي كنمرض”،
وزادها واحدة خرافية ديال الموضة: “جات معك الكسوة الزرقا، أحسن من الكسوة البيضاء ديال الصباح” … يا سلام على الرومانسية ديال الدواوير !
ماشي غير وقف هنا، السيد خدم سبايدرمان، وحاول يتسلق لسقف دارها، غير هو نسى أن هادشي راه ماشي فيلم، والدرك كيتفرجوش فـ”نتفليكس”.
السيدة بدورها مزوجة وأم 3 أطفال ، ما عجبهاش الحال، وخافت على راجلها وولادها، مشات ديريكت للنيابة العامة، وقالت لهم: “شوفو ليا هاد روميو، راه فات القياس” !
جاو الدرك، شدوه، دخلوه سجن بوركايز، وداز سيمانات كيتأمل فالحب، والندم، والتقديرات الخاطئة.
من بعد تدخلات العائلة، وتنازل الضحية، خرج سي العاشق، لكن المحكمة ما خلاتوش يمشي بحالو بلا عقاب: حكمت عليه بشهرين موقوفي التنفيذ و2000 درهم غرامة، باش يتعلم أن الحب فزمن الواتساب راه خاصو ترخيص!
11/04/2025
